ឃ្មុំ​ជា​សត្វល្អិត​មាន​ប្រាជ្ញ​ខ្ពស់បំផុត​

ឃ្មុំ​មានកំណើត​មក​តាំងពី​ជាង ១១០​លាន​ឆ្នាំ​មកហើយ​, ប៉ុន្តែ​ទើបតែ​ប៉ុន្មាន​ពាន់​ឆ្នាំ​មុននេះ​ប៉ុណ្ណោះ ដែល​មនុស្ស​យើង​បាន​យល់ដឹង និង​ចេះ​ប្រើ​ពួកវា​ឲ្យ​មាន​ប្រយោជន៍ ។

​ ​កាលពី​ប៉ុន្មាន​ឆ្នាំ​កន្លងទៅនេះ មាន​ព័ត៌មាន​ជាច្រើន​ត្រូវបាន​គេ​បំពង​ចេញពី​គ្រោះអាក្រក់​របស់​ឃ្មុំ ។ ចំនួន​ឃ្មុំ​ និង​សំបុក​ឃ្មុំ​បាន​ថយ​ចំនួន​ចុះ​ជា​លំដាប់ ការថយចុះ​ចំនួន​ឃ្មុំ​ពិតជា​រឿង​មួយ​គួរ​ឲ្យ​សោកស្តាយ​ណាស់​ ពីព្រោះ​វា​ធ្វើ​ឲ្យ​ប៉ះពាល់​ដោយ​ត្រង់​ទៅលើ​វិស័យ​កសិកម្ម ដែល​ពឹងផ្អែក​មួយចំនួនធំ​ទៅលើ​ការងារ​របស់​ពពួក​ឃ្មុំ​ទាំងនោះ ។ ដូច​តួយ៉ាង​នៅ​ប្រទេស​អង់គ្លេស​ចំនួន​សំបុក​ឃ្មុំ​បាន​ធ្លាក់ចុះ​យ៉ាង​ឆាប់រហ័ស​ជាង​ប្រទេស​ដទៃ​ឯទៀត​នៅក្នុង​អឺរ៉ុប ពីព្រោះ​ជាង​ពាក់កណ្តាល​នៃ​សំបុក​ឃ្មុំ​ត្រូវ​អន្តរាយ​លែងឃើញ​មាន​ទៀត ក្នុង​រយៈពេល​ជាង​២០​ឆ្នាំ កន្លងមកនេះ ។

​ ​ក្នុង​សបា្តហ៍​កន្លងទៅនេះ​, មាន​សេចក្តីប្រកាស​មួយ​ត្រូវបាន​គេ​ធ្វើឡើង​ដោយបាន​ឲ្យ​ដឹងថា ការផលិត​ទឹកឃ្មុំ​បាន​កើន​ច្រើនឡើង​យ៉ាងខ្លាំង​, នេះ​បណ្តាលមកពី​អ្នក​ទើប​ចេះ​ចិញ្ចឹម​ឃ្មុំ​ដំបូង ។ បាននាំគ្នា​ចិញ្ចឹម​ឃ្មុំ ដើម្បី​សង្គ្រោះ​ការបាត់បង់​ពួកវា​, អ្នក​ទាំងនោះ​ចាប់ផ្តើម​បង្កើត​កន្លែង​ចិញ្ចឹម​ឃ្មុំ​តាម​ចំការ​របស់​ពួកគេ ។ ឃ្មុំ​មិនមែន​ត្រឹមតែ​ជា​កងទ័ព​ដែល​ជួយ​ធ្វើ​ឲ្យ​ដំណាំ​មាន​ផ្លែផ្កា​ឲ្យ​មនុស្ស​យើង​តែប៉ុណ្ណោះ​ទេ ប៉ុន្តែ​ពួកវា​គឺជា​ពពួកសត្វ​ដ៏​អស្ចារ្យ​បំផុត​នៅលើ​លោក​យើង​នេះ បើ​គ្មាន​ពួកវា​ទេ​ពិភពលោក​យើង​នេះ​អាច​ជួបប្រទះ​បញ្ហា​ធំ​មិនខានឡើយ ។​

​ ​អ្នកវិទ្យាសាស្ត្រ​បាន​រកឃើញថា ឃ្មុំ​អាច​រាប់​រហូតដល់​ប្រាំ​, រួច​បាន​បង្រៀន​ពួកវា​ឲ្យ​ចេះ​ស្វែងរក​កន្លែង​ដែល​គេ​បានដាក់​ចំណី​ឲ្យ​ពួកវា​ទៅតាម​កាល​វេលា​ដែល​បានកំណត់ ។ ឃ្មុំ​ដែល​ត្រូវបាន​គេ​យកមក​ពិសោធន៍​, អាច​ស្វែងរក​ទីតាំង​ដោយ​ការចងចាំ​របស់​វា​, វា​ចេះ​កត់ចំណាំ​ផ្លូវ​ទៅ ​និង​ផ្លូវ​ត្រឡប់​វិញ​ដោយ​ប្រើ​ទីតាំង​ផ្សេងៗ សម្រាប់​សំគាល់​ដោយ​ពួកវា​អាច​រាប់​ចំនួន​ និង​ចេះ​ចំណាំ​កន្លែង​បាន​យ៉ាងនេះ​ធ្វើ​ឲ្យ​គេ​សន្ម​ត់បា​ន​ថា​ឃ្មុំ​ពិតជា​សត្វ​ដ៏​មាន​ប្រាជ្ញា​បំផុត​បើ​ប្រៀបធៀប​ទៅ​និង​ទំហំ​ខ្លួន​របស់​វា ។ ពួកវា​ចេះ​ជ្រើសរើស​កន្លែង​សម្រាប់​កសាង​សំបុក​ថ្មី និង​ដឹងថា​ពេលណា​ត្រូវធ្វើ​សំបុក​ថ្មី ។ ពពួក​ឃ្មុំ​ខ្លះ​ចេញ​ស្វែងរក​ទីតាំង​ថ្មី​មួយចំនួន​ក្រោយមក​ពួកវា​នឹង​ជ្រើស​រើសយក​ទីតាំង​ណាមួយ​ជា​ប្រាកដ ហើយ​ការ​ជ្រើស​យក​ទី​មួយណា​នោះ គឺ​អាស្រ័យទៅលើ​សម្លេង​យល់ព្រម​ភាគច្រើន ចំនួន​លេខ​ខ្ពស់​សម្រាប់​កា​យល់ព្រម​នោះ​គឺ​១៥ (​កូរ៉ុម​) ។​

​ ​ឃ្មុំ​ដែលជា​អ្នកធ្វើការ (Workers) មាន​ប្រ​ម៉ោ​យ​អង់​តែ​ន​ដែល​ផ្គុំ​ឡើង​ដោយ​ប្រព័ន្ធ​រំញោច​ចំនួន​បី​ពាន់ (៣០០០) វា​អាច​ស្គា​ស់​ក្លិន​ចំនួន​ជាង​១៧០​យ៉ាង ទាំង​ក្លិន​ផ្កា​, ទឹកដម​ផ្កា​, ទឹក​, ជ័រ​ឈើ និង ក្លិន​ពិសេស​ម្យ៉ាង ៕
ដោយ ការស្រាវជ្រាវ កុសល ថាច់